الاثنين، 31 مارس 2008

العنكبوت

عاجبكم كده....
شايفين وصلتوني لاية...
قاعد على الارض .....لوحدي في غرفة حجز.... حقيرة .....ضيقه...رطبه...
مظلمة....زي القبور.....نفس الصمت..نفس الخوف...
انا مدفون ولا محبوس... مين هيحاسبني.....ربي سبحنه وتعالى......ولا عباده......
....الظلام ده ضلام قبري..ولا ضلام ..صدري...
ضلام عملي الاسود...!!!!!
بس!!!!!
انا تبت ياربي...تبت يارحمن..!!!
مش كده وبس انا كمان واجهت....ولسه هواجه....
يارب فرصة تانيه..يارب ميكونش قبري..يارب مكونش ميت...
ياه انا لسه حي!!!؟؟؟
امال ايه بيصرخ جوايا...صوت ضميري؟؟؟؟
اول مره اسمع صرخة صمتي وخوفي...
انا مرعوب بس عندي امل في النجاه...خايف بس حاسس اني لسه عايش
بردان..انا
جعان ..انا
خايف بس مش هتراجع
الضلام مش هيشدني تاني
بعد ماشوفت النور وعرفت طعمه
مش ممكن ارجع للظلام تاني...
انا هنا بقالي حوالي 18 ساعة...
تقريبا كده....
محدش سال فيا ولا عليا....

محدش من اهلي يعرف انا فين
ملحقتش ابلغ حد...
زمنهم هيتجننوا عليا...
سرحت في ولادي...
وفي ركن الحجز...... لمحت عنكبوت اسود صغير...
انا شفته اول ما دخلت الحجز....
يااااااه
بقاله 18 ساعة عمال بيبني شبكة وخطة عشان يصطاد.....
يصطاد صرصار صغير...
واقف في الركن التاني..عايز يصطاده علشان يعيش هو وولاده... اكيد...!!!!!
كل ميخلص جزء من الشبكة يتقطع جزء...تاني ويرجع يصلحة تاني..
صبر عجيب
مبيتسرعش ابدا.... تعب اكيد...
بس كمان مملش ولا اتردد

اتفتح باب الحجز...ودخل صول شكلة طيب..
قوم يابيه
حضرة الضابط عايزك؟؟؟؟
قمت معاه
عدلت بدلتي ونضارتي
حاولت امشي بثقة وهدوء وشيء من التعالي...
بشجع نفسي مش اكتر......
يا ترى تهمتي ايه
وهيواجهوني بايه...
اقعد يا مهاود..
شكرا يا باشا
الباشا ضخم اوي واضح انه طويل متين العضلات
عنيه مخيفة
مالهاش عمق
بارده مفيهاش مشاعر
تحس بمجرد النظره انها دخلت جواك
وبتهددك بترهب عقلك وتفتش في ضميرك..
ومبتعكسش حاجه من روح صاحبها
مخيفه وغريبة....شكلها عمرها ما عرفت الرحمه ....ولا جربت طهاره الدموع...
اسمك بالكامل؟؟؟؟
قبل التعارف مش اعرف بكلم مين وانا هنا ليه؟؟؟
عقيد زعبلاوي الريس ...امن دوله
انا هنا ليه
مين قال ان حضرتك اساسا هنا...حضرتك مش مقبوض عليك ومش معتقل ولا حاجه ببساطه انتا مش هنا ومش موجود
الكلام ده مخيف وخطير ومكنتش عامل حسابه خالص...يارب..يارب
انت دلوفتي معايا بشكل ودي..جدامفيش حاجة رسمي لسة
خلي بالك من لسه دي!!!!!!!!
وبصراحة انا هاجي معاك من الاخر خالص علشان انت شكلك طيب وغلبان..
انت معايا هنا لحد ما اعصابك تهدا وتقولي انك ندمان على مقابلة معالي الوزير
وتنسى خالص موضوع انك تتغير وموضوع انك تبت يا راجل هو انت كنت بتعمل حاجة غلط عشان تتوب؟؟؟؟
اقعد هنا وبالمره الاعتماد يتمرر!!!!
ايه الحكايه انت لسه مش مركز ولا مش واخد بالك انك ممكن تقعد هنا كتير جدا
لحد ماتنسى كل حجه حتى نفسك
وكل حاجه بره هتمشي كويس خالص

يعني اعتقال ده بقى
يا مهاود بيه اهدا
لوسمحت
احنا لحد دلوقتي محترمينك اكرما لانك كنت مننا ولانك متوصي عليك من فوق نعاملك بالراحة!!!!!!
بس صبر ي له حدود وايامك معايا طويله وسوده لو مساعدتش نفسك وساعدتني!!!
لا يا باشا
انت مستحملني ومحترمني عشان الورق اللي عندي
ومالقتهوش لا في البيت ولا المكتب ولا أي مكان ومعالي الوزير قلق لما انا لمحت بيه....
الباشا عنيه نورت...واحمرت ....وحاولت تهرب من وشه الاسود القاسي
بس مالقيتش حد ممكن يقبلها ويستحملها رجعت تاني....
وايديه اتحركت...بسرعه...
وقعدت تتنطط على خدودي وقفايا بكل سرعه وقسوة
ولسانه
بدا...
بتهددنا يابن الشر....
يابن...
نزلت نقطة دم في بقي ....
طعمها مالح..
يظهر ان كل نقطه عرق ...هربت منها زمان ... واستسهلت طريق الفساد...هدفع تمنها نقطة..دم..!!!!
بس مش مهم المهم.... ربنا ...يغفرلي... ويسترني!!!
متشتمش يا باشا واسمعني كويس:
الورق اللي عندي انتوا عارفين كويس فيه ايه
وانا عامل منه تلت نسخ..!!!
واحده مع واحد صاحبي
وواحده مع واحد صحفي
والتالته مع صديق في السعوديه والتلاته
عندهم تعليمات لو اختفيت او اتغيبت اكتر من 24 ساعه ينشروا الاوراق والمستندات في الصحافة
في التلفزيون
في النت
في الدنيا كلها
الباشا سمعني وهو مزهول
المدهول ده يعمل كده!!!!
الباشا مخفش
متهزش
يس انا حسيت انه من جواه
بيترج......
حسيت انه ..... هو الصرصار
وانا العنكبوت

جرني الصول على الحجز تاني وانا بصرخ
قدامك ست ساعات بس
وجوايا بيصرخ
لحد امتى... انا عنكبوت.... وهما.... صراصير؟؟؟

وبسال نفسي سؤال واحد وانا راجع الحجز...
ياترى هلاقي الصرصار في شبكة العنكبوت ...ولا قدر يهرب .....
بس كمان قلبي كان بيدعي لست الناس وافكارها العبقرية!!!!!