البدايه

صحيت ....
تعبان من سهر وارق ليلة امس
حطيت نفسي جوه الهدوم...
توكلت على الله وخرجت
ناوي وعازم اتوب ومعملش غير الصح
ما هو انا والله جوايا خير كتير....بس...
خلاص مفيش فساد ولا افساد.....
دخلت مكتبي مكتئب وحزين!!!
مفيش دقيقتين
عبد القوي بيه عايزك يا فندم!!؟
بلغيه هخلص قهوتي واروح له علطول
لا هو مستعجل
طيب ....طيب...
عبد القوي بيه صباح الخير..
صباح الخير يا مهاود...( اسمي بس معدش وصفي)
انت فينك يا راجل!!؟
موجود يا فندم وتحت امرك
لا شكلك محتاج اجازة!!!
صحيح قولي الاعتماد بتاع قطع الغيار اخباره ايه؟؟؟؟
بدأت اشم ريحه خطر....هي الليله قلق من اولها!!!!
حاول تخلصوا بسرعه وجهز نفسك تكون ضمن الوفد اللي هيسافر يعاين قطع الغيار
في فرنسا ...باريس....
يالا يا بطل استعد لباريس وما ادراك ما باريس!!!!!
اه اه هي كده بقى دي الجزره امال فين العصايه؟
طبعا المجنون والفيلسوف نطوا ورا بعض جوه تلافيف مخي وكل واحد فيهم عايز هو اللي يرد...
بس على مين انا اتعلمت الدرس انا اللي هرد
يا فندم:
انا مش هوقع على الاعتماد...والاسباب كتير وحضرتك ادرى الناس بيها...
اسف انا مش هغلط تاني..ومش هخاف ..مش هخاف
اهدا كده يا راجل ...مالك...
شكلك متغير وتعبان خالص
وبضحكه صفرا
انا مش قولت انك تاخد اجازة ترتاح
خدلك اسبوع قضية في الشالية بتاعي في الساحل الشمالي
وبعدين ارجع تاني عادي وفريش
انت غالي عليا يا مهاود....
يا فندم وانا في الاجازة عمران هيمشي الاعتماد؟؟؟!!!
اكيد اهو انتا رجعت تفهم اهه قالها المجنون
بانفعال شديد جدا ....ايه وانت مالك
انا حاسس انك مش طبيعي من فتره
لا اصحى فوق
هاود يا مهاود احسن!!!!!
انت عارف
الارزاق بالله وعلى الله وبعدين الحق دايما قوي متخافش
عبد القوي بيه
خلينا صرحا مع بعض
انا خلاص فقت ومش هفوت حاجة وهمشي صح ومش هتقدر تعمل حاجة
واضح
واضح قوي ياسي معاند
مهاود يافندم
ده كان زمان
..........................
خرجت من مكتبه وانا بغلي ومتوتر وكل حاجه فيا بترتعش
متوتر اه
خايف اه
يمكن مرعوب كمان
بس حاسس براحه غريبه جدا
يمكن لاني بدات رحله الطهر والنور ولا لاني اقدر ارفع راسي قدام المجنون والفيلسوف وست الناس
ولا لاني لاول مره من زمان هسجد لربنا واطلب منه النصر والمعونه وانا حاسس اني استاهل فعلا
ومش مكسوف من نفسي ؟؟؟؟
فيه ايه يا سعاد
البنت دي دخلت خضتني وانا سرحان!!!
مكتب معالي الوزير عايزك
مين ؟
نهار اسود ومهبب بهباب مطين بطين مهبب
الوزير
ليه؟؟؟؟؟
طيب ياسعاد حولي التليفون
لا يافندم ده مدير مكتب معاليه
طلب حضرتك تحضر اجتماع النهارده الساعه اتنين وهيكون فيه.......
تهت انا نها ومسمعتش حاجه
خلاص رحنا في داهية
مرعوووووووووب مرعوب
انا عملت ايه وفتخت على نفسي ايه ما كنت كويس
اعقل واثبت ...مش معقول الوزير عايزك عشان الاعتماد....ولو حصل...برضة انت اقوى من كده
ولازم تفضل صلب وراجل
................
كل الافكار السوده معششه جوايا دلوقتي
كل حته فيا بتهرب مني
خايف جدا
مش عارف اعمل ايه
واحنا في الطريق لمكتب الوزير ....عنداشارة المرور اول ميدان التحرير..
شفت حاجة عجيبة
راجل عجوز جدا يمكن عنده ميت سنه ويمكن حتى يكون بالفعل ميت بس سبحان الله
شايل طفل صغير معاق
وبيعدي بيه الشارع!!!!
وقفت لهم عربيه حديثة جدا ونزل منها راجل محترم جدا ...شكلة بيقول كده
عرض عليهم يوصلهم...
بس العجوز رفض ... وبكل كرامه قال له حملي انا اشيله ومسئوليتي انا اتحملها وثوابي عند ربي
صاحب العربيه بص له بكل ود وقاله انا زي ابنك
سيبني اساعدك احنا لازم نشيل بعض ونعين بعض على الخير
الاشارة فتحت...
واتحركنا وانا بصيرتي نورت
هستمر في طريق التوبة...

دخلت مكتب الوزير
حاجة فخمة كده
واسع اد شقتي تقريبا بس من غير اود نوم ...كله صالونات
تحس كانك قاعد في عزا
بس مفيش قرآن
دخل معاليه علينا
سلم عليا وشد على ايدي قوي وبص في عنيا
كانه شاف كل اللي جوايا
كاني مصنوع من زجاج شفاف وقابل للكسر
اه ياخوفي لا اتكسر النهارده
البلد بتتطور وتتحسن
طبعا هو اللي بيقول كده واحنا بنهز راسنا زي يونس شلبي في العيال كبرت
التطور ده مستمر ومستدام ومن يوم ليوم بيتحسن
بس يمكن بعض المواطنين مش فاهمين او مش حاسين
بس احنا المسؤلين طبعاعارفين
فية طريق بداناه ولازم يكمل...مين اللي قال كده انا ولا هو....متفرقش اللي عايز اقوله ..متسمحوش ابدا للحظة ضعف او نظرة قصيرة او عدم ادراك يعطل المسيره
الله هو الوزير قريب الفيلسوف
ولا هو نفس الكلام ممكن يكون بالف معنى ولا انا سرحت ....
مفهوم ؟؟!!!
مفهوم يافندم...
كأنه طابور المدرسه صوت عالي بدون تفكير او ادراك
حد عايز يضيف حاجه...يقول حاجه...انا ديمقراطي وسامعكم....
رفعت ايدي بتردد شديد
مدفوعا بنوبه الضمير الصاحي وكلام الوزير المشجع...
اتفضل يا مهاود يابني..انا عارفك ومتابعك....
قول
يافندم....
وشرحت له كل المخالفات وموضوع الاعتماد
مع كل كلمه مني كان الراجل يحمر زياده وعروقه بتتخانق مع بعض عايزه تهرب وتسيب رقبته
حسيت انه خلاص هينفجر
ايه ده اسكت يامهاود
ده انت مش مهاود خالص
عموما.....الكلام ده مرسل ومن غير دليل..
يافندم الدليل موجود في مكتبي
لالالا انا مش عايز صراعات شخصية ومهاترات عموما انا مكتبي هيحقق في الموضوع اتفضلوا
............................
في الطريق للعوده لمكتبي ...كنت مش حاسس بحاجه خالص كنت متنح
متنح لدرجه التجمد الفكري والبدني
دخلت المكتب وبدات اجهز مستنداتي
انت مهاود...
مين حضرتك؟؟
ايه الباب اللي دخل من الباب ده ..... طول بعرض وبيزعق كمان
رد انت مهاود
ايوة زفت
انت مين
عقيد زعبلاوي
مباحث اموال عامه
انت مقبوض عليك
..............
يتبع