بعد النهايه....بدايه...............( بقلم ست الناس)

*اسمك وسنك ومهنتك وعنوانك؟؟؟؟؟؟؟
مهزومه انا....
مظلومه
كل الالوان في عيوني سودا
قاعده قدام وكيا النيابه
هو بيسال ومين بيجاوب
انا اللي جوايا النار...والالم
انا مش زعلانه قوي على مهاود
قد ما انا زعلانه على نفسي
انا اساسا عمري ماحبيته
عمري ما احترمته
ان بس كنت مراته
عقد قانوني مش انساني
بس نتيجته انسانيه
انا كنت مراته

احترمته بس اخر يوم في عمره
عمري ما احترمته غير لما تاب
وحاسه ان موته هو الحاجه الصح الوحيده اللي عملها في حياته
- اسمي ست الناس
- ربه منزل
- عنواني وسني في مكتوبين في البطاقة
كويس انه سال عن سني مش عمري
اصل عمري من طول الحزن
الف عام
ابويا الله يرحمه فرضه عليا جاهز وكويس
مش عيل زي اللي انتي متعلقه بيه
مقلتش لا
ايامنا مكنش فيه لا
ويمكن انا
مكنتش اتعلمتها
كان انسان
مهذب وبسيط
بس بخيل
مش في الفلوس
......دي مقدور عليها
كان بخيل مشاعر
عمره ما كان حنين
وانا اللي كنت بحر حنان
كنت مركب في ليل الحزن محتاج ربان
بس هو مهتمش
كان بخيل حته بالكلمه الحلوه
*ما هي اقوالك في واقعه وفاه زوجك مهاود؟؟؟؟
مهاود مات!!!!!
هو امتى اصلا عاش
لا...دا هو اتولد لما مات
من يوم ما عرفته وهو ميت...و من غير روح
امبارح بس اتولد ...وعاش
عيشتي معاه كانت هاديه
بدون صدام هو مستريح لبخله في كل حاجه
وحب فيا اني مش عاوزه منه حاجه
حطيت همي وحزني واملي في نور عيوني
ولادي

هو حط كل حاجه وديعه في البنك
الفلوس...المشاعر....الاحساس...الايمان....حتى الايمان
كان فاكر انه في أي لحظه ممكن يفك الوديعه
ويصرف منها
عمره ما عرف كل الحاجات دي كان بيجمعها ويحوشها وبس!!!!
عمره ما عرف ان اللي ما بيعشهوش ....... مبيحسوش
وميقدرش يحوشه ويصرفه بعدين
اخر يوم في عمره
طلّع كل حاجه
وحاول يصرفها من البنك
مره واحده في عمره قرر يصرف

عشان كده هو اتولد يوم ما مات
*ايه الظرف اللي حضرتك مقدماه للنيابه دا؟؟؟؟؟
دا يا فندم فيه المستندات اللي مهاود مات عشانها
المستندات اللي تخلي موت مهاود توبه بجد
تخلي له قيمه وتمن
ترفع عنه وزره وتريحه في قبره
دي كل مستندات الفساد اللي هو شافه وعاشه وصنعه وشارك فيه

المستندات دي هي الحقيقه اللي عاش طول عمره يخاف منها ويجمعها
*طيب حضرتك بتتهمي مين بقتله؟؟؟
مهاود
اتفتل
مش مهم مين قتله امبارح
المهم مين قتله من 27 سنه مين سرقه مننا
المهم مين خلق الفاسد والفساد
المهم مين ولد الظلم ووللده جوانا
مين علمه وعمله
المهم يافندم
اللي بدا اول خطوه في الطريق الاسود
مش اللي عمل اخر خطوه
يا فندم
القاتل بيقتل واحد
السارق بيسرق واحد
الفاسد
بيقتل وطن ويسرق حلم ومستقبل
*هل لديك اقوال اخرى؟؟؟؟
ايوه كلمه واحده اخيره

توبه فاسد واحد مهمه ليه هو
بس مش هي الحل
الحل توبه وطن
الحلم توبه وطن
يارب
يارب وطني يتوب...عن فساده
عن قهره
عن ظلمه
عن احتضانه للفاسدين
يارب يتطهر ويطهرنا معاه

ملحوظه: المحضر لسه مفتوح

والوطن لسه اسير

والمواطن مقتول

والتايب مدفون ومحدش خد بتاره!!!!