رجعت البيت

النهارده اول يوم في مكتبي بعد حادثه العربيةوالصدام البسيط مع الاستاذ عماد
( عرفت من بعض الناس انه له قريب عنده كمبيوتر ونت عشان كده الحرص واجب)
وبعد سوء التفاهم البسيط في المستشفى......!!!!!!
سددت الفاتورة واتبرعت بمبلغ بسيط اقل من الفاتورة يعني....
وطبعا اهم حاجه استرديت سلسلة ست الناس والحمد لله
استرداد السلسلة كان لانها عزيزة عليا قوي - ست الناس مش السلسلة-
المهم بعد الاحداث دي كلها رجعت البيت...تعبان ومكتئب وبجد محتاج ارتاح...
ونتيجة لغلطة صغيرة اثناء دخولي البيت وبسبب التعب مش تجاهل التعليمات لا سمح الله
ست الناس فهمتني غلط!!!!!!
واصرت انها تنيمني براحتي لوحدي في البلكونة
علشان طبعا انا نفسيتي تعبانه.... ومحتاج اشم شويه هوااااااااااااا
هنا لازم اوضح تقطتين مهمين جدا:
- البلكونة متقفله الومينتال محترم وفيها كنبة كويسه.....ومريحه خالص في النوم
وكمان فيها الكمبيوتر علشان كده هي حبيبة قلبي بجد - البلكونة مش ست الناس-
النقطة الثانية.......ست الناس قصدها راحتي مش عزلي لا سمح الله
صحيح انا معرفتكمش عليها....
هي طيبة جدا والله ....
عصبية شوية....ممكن
عنيفة حبتين...عادي
مبتسمعش الطرف التاني لانها غالبا بتكون لسه ببتكلم ( عمرها ما خلصت كلامها من تلت سنين)
بس احلى حاجة فيها انها انسانه مثالية جدا
مبتغلطش ابدا ...ابدا
دايما على حق..
واخر غلطة ليها لما اتجوزتني - هي اللي بتقول كده والله وانا مؤيدها في ده تماما
هي سمينة شوية بس في الخطوبة كانت رفيعة
كمان صوتها عالي شوية... بس زمان كان هادي ورقيق جدا
طبعا اسمها مش ست الناس دا وصفها والاسم الحركي ليها بس الجيران
بيسموها ست جيرانها.....
والولاد مسمينها.. الحكومة والعياذ بالله - الغياذ بالله من عندي مش من الولاد-
بس هي دايما تقول انها الغلبانه المظلومه في عيشتها
مش هطول عليكم...
طبعا نفذت وقعدت في البلكونه اللي مفروض تكون مكان عقاب بينما هي مكان السعاده
الوحيد في البيت بس الله يخرب بيت الفيلسوف طلعلي من تحت الكنبة وهات يا تريقة وبعدين قالها في وشي واضحة وصريحة ومباشرة
انت ليه ضعيف ومهزوم ومتهان كده؟؟؟؟؟
ضعيف ومهزوم في بيتك...
ضعيف ومهزوم غي شغلك...
ضعيف ومهزوم في حياتك...وبلدك...
انت نموزج بيدربوا عليه الضعفا الصغيرين من اشبال الحزب الوطني
عشان لما يكبروا يبقوا زيك.................
طبعا انا مسكتش للفيلسوف الغلس ده ...
لا لا لا ياحبيبي
مش لاني متربي على طاعه كل واي مركز قوه والانهزاميه قدامهم بدون نقاش او اسباب
( ماما -استاذ ناصر بتاع الكيميا في المدرسة- مديري في الشغل- الريس المبارك....وست الناس طبعا) لا لا
ولا لاني متعودتش ابدا اقول لا رغم انها اقوى واجمل واكمل كلمه ( حاليا تتجه نحو الانقراض بفعل عوامل انسانية مش بيئية)
ولا لاني دايما محتاج المعونه..........والمحتاجتابع ضعيف بدون راي
ولا لاني خريج مجتمع شعاره وانا مالي طالما ما بتلمسش مالي....
ولا لاني تعليمي على قديومتعلمتش ان الراي اراده قبل مايكون معرفة خصوصا ان انا جامعي
ولا لاني خواف ومن خاف يا حبيبي سلم.....وسلم امره لغيره...
لا لا السبب غير كده صدقني
ان ضعيف لاني معرفش اكون قوي
متعودتش
معرقش
مقدرش
معلش
والبوست الجاي هقولكم ليه انا كده

اه بالمناسبه والنبي ..امانه محدش يقول لست الناس على عنواني هنا
لحسن والله مدونش تاني وزنبي في رقبه اللي يفتن ليوم الدين!!!!!!!!!!!!

تعريفات:
الادخار: نشاط اقتصادي رائع يمارسه الناس..............في المريخ وكمان الحريه!!!!