انا صلب جدا

بعد ما ضربت الاخ عماد براسي في ايده اكثر من مره لدرجه انه تعب جدا من الضرب وراسي حصل فيها ارتجاج خفيف مع ورم في العين اليمين و شويه الم خفيف خالص في الضلوع الدكتور كتب لي على خروج امبارح اتصلت بحسن صحبي وزميلي واخويا علشان ياخدني بعربيته يروحني من غير ما ازعج ست الناس ( الاسم الحركي لمراتي)

واتعبها معايا.

حسن جه نزلنا سوى على الحسابات علشان احاسب واروح

طلبوا مني 1000 جنية !!!!!!!!!!

- ليه يا جماعه هو انا كنت .... بولد.... دي مجرد خدوش خفيفه ودي مجرد ليله

- يا استاذ انت ما شفتش حالتك كانت ازاي .....

- لا مشفتش النضاره اتكسرت في المعركه ( وده السبب ان اللي اسمه عماد قدر يهرب) ودي غرامه تانيه وربنا يستر على العربيه مشفتهاش كويس!!!!!

- يا فندم دي مشاكلك انت مشكلتي انا انك لازم تدفع والا......

- يالنهار اسود بتهددني انت مش عارف انا مين

مشفتش بطاقتي

عموما هتعمل ايه يعني .... هتحجزني يعني متقدرش تعمل حاجه وبيني وبينكم القانون هاتلي دلوقتي حالا فاتوره تفصيليه وبعدين نشوف انا هعمل فيكم ايه

- يا فندم بلاش صوت عاي ومفيش داعي للاسلوب ده خلينا زوق احسن

- هتعمل ايه يعني هتضربني.... لا عماد ده حادثه وعدت .....انا مش ملطشه

( في اللحظة دي كان حسن متعلق في دراعي وعمال يهديني وانا عامل زي قطر الصعيد مبهداش

والمصيبة ان الفيلوف نط جوه نفوخي واشتغلني تاني: ايوه كده بلاش سلبيه هنفضل لحد امتى ناخد على دمغنا

يتنصب علينا ونسكت ندفع تمن الحاجة بدون ما نفهم بندفع ليه

يتحرق دمنا لحد ما نشتري الحاجه تطلع بايظة ومنتكلمش ولو اتكلمنا ما نسلمش

لا لا كفايه سلبيه انا هدفع اه بس الحق والمعقول مش كده

بصراحه كلامه مضبوط وصح الصح كمان مش هضعف

- اسمع يابني انا مش هدفع هات فاتوه .....وبعدين دكتوري ( جامده دي اكيد هتخوفهم) يدرسها وبعدين احاسبكم

-يا فندم دا مستشفى خاص وانت جيت واتعالجت يبقى لازم تدفع

- (بدبلوماسية ) ادفع اه اتسرق لا والف لا بعدين انا مجيتش ولاد الحلال هما اللي جابوني

- برضه لازم تدفع

- حسن بليز روح هات عربيتك قدام الباب انا تعبت من المناقشة ارجوك عايز اروح

وراح حسن جري

لفيت للموظف وحمرت عيني وبرقت تبريقتي المشهورة اللي ببرقها لما حد من الموظفين بيتاخر او يعمل حاجه غلط

ودي تبريقه مقلقش فوق الفظيعه وبعد المخيفه حاجه كده جامده جدا( عمري ما برقتها لست الناس عشان بخاف عليها وبحبها مش عشان بخاف منها) المهم لما برقت قلتله خلصني فين الفاتوره؟؟؟؟

- طيب يافندم متزعلش نفسك واهدى ( ده مديرالحسابات جه على صوتي ) لو سمحت امضي لي انك خرجت برغبتك ومش هتدفع حاجه غير اللي دفعته والموضوع منتهي ومش محتاج مشاكل

- ممتاز بس انا برضه هراجع دكتوري ولو ليكم حاجه ادفعها انا مش نصاب

- اوكي يا فندم امضي حضرتك هنا ومع السلامة شرفت

-سلامو عليكو

ناس تخاف متختشيش حراميه ونصابين

بس ايه اخوكم جامد لما شديت عليهم تراجعوا فورا وخافوا مني ومن مركزي ويمكن كمان عشان هما غلطانين خافوا وتراجعوا لما لقيوا واحد قوي وفاهم

حسن فين ....اهه .....ز ومشيت لحد حسن والعربية وانا زي الطاووس منفوخ بكبرياء النصر

- عملت ايه خرجت ازاي ......... قالها حسن بكل فضول وقلق ولهفه...

- يابني اخوك مبيخفش في الحق وكمان بيخوف

هما خافوا مني لافتح عليهم باب جهنم وانتا عارفني

مضيتلهم اني مش هدفع غير اللي دفعته ودي مخالصة وخرجت رافع راسي

الحراميه من كتر السرقه نسيو اني مدفعتش اصلا ويمكن من الخوف

- يا دي الداهيه السوده يا عم القوي مراتك سايبة ساسلتها الدهب في الامانات لحد ما تجيب فلوس وتيجي

- ملحقتش اسمع الباقي اغمى عليا دي ست الناس

وشالني حسن على المستشفى تاني





___ تعريفات ___

البحلقه هي

مرحله من التطور يسير فيها الانسان في السوبر ماركت ويمارس هوايه الفرجة فقط دون الشراء

وهي مرحله متقدمه من مراحل التطور الاقتصادي في مصر